Det 18 år gamle spisstalentet Mats Solheim blir Sogndal-spelar. Stryningen, som i fjor vart suveren toppscorar med heile 34 mål i sin første sesong i 3. divisjon, kan ikle seg Sogndal-drakt tidlegast til sommaren. No er Sogndal i kontakt med Stryn for korleis detaljane rundt overgangen skal løysast.

– Me har ikkje gjort noko konkret avtale enno, men slik me ser det blir han Sogndal-spelar, seier sportsleg leiar i Sogndal Fotball, Anders Giske. Han ser ingen skjær i sjøen for at overgangen skulle falla gjennom. No er partane i dialog om når tidspunktet for overgangen skal finna stad.

– Me er inne i ein prosess med Stryn om kva kamparena han skal spela på. Denne er ikkje avslutta enno, seier Giske. Økonomien i avtalen er ikkje noko stridspunkt.

– Me har ein mal der me tilbyr Stryn det me har tilbydd andre klubbar ved liknande overgangar. Me betaler meir enn me hadde trengt, seier Giske.

Med Mats Solheim er den første spelaren av den nye generasjonen til Rolf Navarsete på plass i Sogndal. Dei heitaste spelarane i same kategori er, Sindre Kjos Wenjum (Sogndal Fotball), Oddbjørn Skartun (Sogndal Fotball), Erlend Nygaard Kvalheim (Tornado Måløy FK), Nicolai Øveraas (Førde IL), Gisle Isene (Førde IL), Stig Hårklau (Førde IL), Preben Strypet (Kaupanger IL), Peter Orry Larsen (Skavøypoll IL), Ulrik Flo (Stryn TIF), Even Hovland (IL Høyang) og Allan Jørgensen (Årdal FK).